Motivim

Do të nisësh stërvitjen, por nuk di nga t’ja fillosh? Atëherë lexo këtu!

Aulona të lutem më ndihmo, dua të nis stërvitjen, por nuk di se nga t’ja filloj. Kjo është një nga fjalitë që dëgjoj/lexoj më së shumti. Shumë nga ju, si ato që kanë vendosur me dëshirë e kënaqësi të nisin stërvitjen dhe të bëjnë ndryshimin e madh tek vetja, ashtu edhe pjesa tjetër që edhe pse e kanë marrë vendimin, sërish e kanë me shumë përtesë, kanë një gjë të përbashkët: mungesën e informacionit se nga dhe si t’ja nisin. Prandaj ky artikull do t’ju vijë në ndihmë, duke shpresur t’i jap përgjigje dilemave që keni në lidhje me nisjen e aktivitetit fizik. Lexoni dhe mbani shënime.

Por si fillim lexoni këtë: Përse është e rëndësishme të stërvitesh?

Sepse, në radhë të parë është e provuar shkencërisht që aktiviteti fizik përmirëson ndjeshëm shëndetin tuaj. Ju ndihmon të arrini dhe të mbani një peshë ideale, duke ulur masën dhjamore dhe rritur atë muskulare, çka do të thotë shëndet më i mirë, duke ulur rrezikun e sëmundjeve të ndryshme.

Po ashtu, aktiviteti fizik ndikon pozitivisht në mirëqënien tuaj mendore dhe shpirtërore, duke rritur humorin, larguar stresin, përmirëson gjumin, e madje ka ndikim pozitiv edhe në jetën tuaj seksuale.

Me pak fjalë: aktiviteti fizik ka fuqinë të ndryshojë për mirë jetën tuaj.

Jeni gati të mësoni si dhe nga t’ja filloni?

1. Bëni një plan dhe vendosni qëllime të vogla për të mbërritur tek ato të mëdhajat

E dini cila është një tjetër pyetje që më bëhet pafundësisht: Aulona për sa kohë mund ta bëj trupin si i joti? Aulona për sa kohë mund të dobësohem 10 kile? Aulona sa kohë më duhet për të bërë një trup të bukur?

Të gjitha pyetje të gabuara. E para, nuk ka dhe nuk do të merrni kurrë një përgjigje të saktë për këto pyetje. E dyta, edhe sikur të kishte (por në fakt nuk ka) nuk do të ishin të sakta. E treta, lexo pikën nr 1.

Pra besoj u kuptua qartë? Koha nuk ka rëndësi, rëndësi ka të nisësh tani ndryshimin. Nëse nis të stërvitesh dhe të ndjekësh një regjim të shëndetshëm ushqimor, ndryshimi do të vijë s’ka nga shkon. Dikush mund të shohë ndryshimet e para për 2 javë, dikush për 1 muaj, e dikush për 2 muaj. Kjo është shumë relative dhe varet nga disa factor: në radhë të parë metabolizmi dhe organizmi i gjithësecilit. Pastaj ndikon vullneti, përkushtimi dhe dedikimi, sa më i qëndrueshëm të jesh, aq më shpejt vijnë rezultatet. E kështu me radhë.

Pra fillimisht vendos qëllimin kryesor: Do nis aktivitetin. Do zbras gjithë dollapet dhe frigoriferin nga ëmbëlsirat. Nuk do ha fast food për një javë. Dhe kështu ditë pas dite, shtojmë qëllimet dhe objektivat për të arritur tek ai përfundimtari: të arrijmë peshën që duam.

 

2. Shndërroje në rutinë

Nëse do ta nisësh aktivitetin fizik me përtesë, si një detyrim, apo hangari që duhet bërë, më vjen keq që po ta them, por nuk do të të çojë gjëkundi. Në momentin që e vendos ta nisësh ndaje mendjen dhe bëje rutinë. Jo një ditë po dhe 3 jo. Nëse do të ndjekësh një program stërvitor, nëse do rezultate, ndiqe rregullisht, jo ta lësh kur sheh rezultatet e para (sepse do të ktheheshe sërish aty ku ishe), por duke e bërë pjesë të jetës tënde.

Bëje pjesë të rutinës tënde, njësoj si vaktet e ushqimit, njësoj si gjumin, njësoj si cdo gjë tjetër që bën gjatë ditës. Cakto kohën që do t’i dedikosh stërvitjes (nuk ka rëndësi se ku, shtëpi, palestër, në natyrë) dhe bëje.

P.S: Rutinë quhet një veprim që ne e përsërisim aq gjatë dhe shpesh, saqë bëhet automatik, duke mos pasur më nevojë për motivim për ta kryer si veprim.

3. Sa orë duhet të stërvitemi?

Një tjetër pyetje që më bëhet shumë shpesh. Pastaj, nuk e kuptoj, kush tha që duhet të jenë orë? Duhet të hiqni nga mendja idenë që sa më shumë të rrini në palestër, apo sa më shumë ushtrime të bëni, aq më rezultat do të keni. Gjithçka varet nga programi që jeni duke ndjekur. Ka programe cardio, si psh crossfit, apo tabata, apo hiit që janë me intensitet të lartë dhe mjaftojnë vetëm 20, apo 30 minuta për t’i ekzekutuar. Ashti siç ka dhe programe të tjerë, që kryesisht janë ato për forcë, apo masë muskulare, ku si pasojë e përdorimit të peshave, koha e pushimit mes seteve duhet të jetë më e madhe (3-4 minuta) dhe për arsye, stërvitja në total zgjatet duke I kaluar edhe 60 minuta. Por asnjëherë me shumë se sa 90 minuta, sepse nuk ka efekt.

4. Nuk mjafton stërvitja, duhet dhe ushqimi

Ju mund të bëni gjithë programet më të mira stërvitore, mund të provoni gjithçka shikoni, apo ju sugjerojnë, ama nëse paralelisht me aktivitetin fizik, nuk përmirësoni dhe mënyrën tuaj të të ushqyerit, duke ndjekur një regjim të shëndetshëm ushqimor, më vjen keq por nuk keni për të parë rezultat, të paktën jo ato që dëshironi.

Prandaj stërvitjen dhe ushqimin shikojini si dy faktorë të pandashëm, në arritjen e qëllimit tuaj final dhe që është: të përmirësosh fizikun dhe shëndetin tënd.

5. Mbaj shënime

Mos ja lërë gjithçka syrit. Padyshim që ndryshimet e dukshme me sy, nga momenti që nis stërvitjen e në javët më pas, tregojnë që ke punuar siç duhet dhe puna të është shpërblyer, por është mirë që në të njëjtën kohë të mbash dhe shënime. Sa kg ishe përpara se të nisje stërvitjen, sa cm ke qenë në perimetër bel, këmbë, krah. Sa je pas një jave? Po pas dy javësh? Shënoi të gjitha, në mënyrë që të shohësh ndryshimet reale dhe në bazë të tyre të dish se si duhet të vazhdosh.

6.Mos u dorëzo

Një gjë është e sigurtë, rrugëtimi nuk do të jetë i lehtë. Do të ndeshesh vazhdimisht me pengesa, do të ketë ditë ku do të jesh shumë e lodhur, do të kesh ditë kur do të jesh e ngarkuar emocionalisht, psikologjikisht, ose fizikisht, ditë ku nuk do të kesh fjetur mjaftueshëm, ditë kur do të jesh e ftuar në një drekë, darkë dhe do ta teprosh me ushqimin. Por kjo nuk do të thotë që duhet të heqësh dorë. Fakti që MUND të devijosh një, dy, apo disa herë gjatë rrugës, nuk do të thotë që dështove. As që “devijimi” duhet bërë rutinë. Ama në asnjë rrethanë mos u dorëzo! Mos hiq dorë nga ajo që ke nisur dhe që është detyrë që ke ndaj vetes dhe shëndetit tënd.

7. Tani, më thuaj, je gati për të nisur stërvitjen?

Pikën shtatë, po e lë t’i përgjigjesh ti vetë.

Lini një Përgjigje